ថ្នាក់ដឹកនាំខេត្តកណ្តាល អញ្ជើញជាអធិបតីក្នុងពិធីសម្ពោធអគារបឋមសិក្សាចំនួន ១ខ្នង ជាអំណោយរបស់អង្គការសប្បុរសធម៌ ហ្វឺសយូនីត នៅស្រុកកណ្តាលស្ទឹង

ខេត្តកណ្តាល៖ ឯកឧត្តម នូ សាខន ប្រធានក្រុមប្រឹក្សាខេត្តក និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល នៅរសៀលថ្ងៃទី១៨ ខែមិនា ឆ្នាំ២០២៥នេះ បានអញ្ជើញជាអធិបតីក្នុងពិធីសម្ពោធអគារបឋមសិក្សាចំនួន ១ខ្នង ដែលមានទទឹង ៩ ម៉ែត្រ បណ្ដោយ ៤០ ម៉ែត្រ និងមាន ៥បន្ទប់ ស្ថិតនៅក្នុងភូមិថ្មី ឃុំថ្មី ស្រុកកណ្តាលស្ទឹង ជាអំណោយរបស់អង្គការសប្បុរសធម៌ ហ្វឺសយូនីត ដោយមានការអញ្ជើញចូលរួមពីមន្ទីរ-អង្គភាពជុំវិញខេត្ត អាជ្ញាធរស្រុក ប្រជាពលរដ្ឋ និងសិស្សានុសិស្សជាច្រើនរូប។

ថ្លែងក្នុងពិធីនេះ ឯកឧត្ដម គួច ចំរើន បានថ្លែងអំណគុណ និងកោតសរសើទៅដល់អង្គការសប្បុរសធម៌ ហ្វឺសយូនីត ដែលបានខិតខំជួយគៀងគរសប្បុរសជននានា ជួយចូលរួមកសាងសាលារៀននេះតាំងពីចាប់ផ្ដើម រហូតបញ្ចប់ការសាងសង់ ជូនសិស្សានុសិស្សក្នុងស្រុកកណ្តាលស្ទឹង ឲ្យមានអគារសិក្សាមួយដែលមានលក្ខណៈសមស្រប ហើយសមិទ្ធិផលថ្មីមួយនេះ គឺជាឧត្តមប្រយោជន៍សម្រាប់ប្រជាពលរដ្ឋក្នុងមូលដ្ឋាន បានបញ្ជូនកូនចៅមកបន្តការសិក្សារៀនសូត្រឲ្យក្លាយទៅជាធនធានដ៏សម្បូរបែបរបស់ប្រទេសជាតិនាពេលខាងមុខ។

ឯកឧត្តមអភិបាលខេត្ត បានបញ្ជាក់ជូនប្រជាពលរដ្ឋ ដែលបានចូលរួមថា កត្តាសុខសន្តិភាព និងស្ថេរភាពនយោបាយ គឺជាមូលដ្ឋានគ្រឹះដ៏ចាំបាច់សម្រាប់ប្រទេសជាតិយើង ព្រោះប្រទេសមួយមានសន្តិភាព គឺមានលទ្ធភាព ផ្តោតការយកចិត្តទុកដាក់ លើកិច្ចអភិវឌ្ឍន៍សេដ្ឋកិច្ចសង្គម និងសុខមាលភាព របស់ប្រជាពលរដ្ឋបានល្អប្រសើរ ដូច្នេះសន្តិភាព គឺជាធាតុផ្សំដ៏សំខាន់ សម្រាប់ធានាចីរភាព នៃកិច្ចអភិវឌ្ឍន៍។ ជោគជ័យទាំងនេះ ផ្តើមចេញពីការដឹកនាំដ៏ឈ្លាសវៃ និងប៉ិនប្រសប់ ប្រកបដោយគតិបណ្ឌិត និងចក្ខុវិស័យវែងឆ្ងាយ របស់សម្តេចអគ្គមហាសនាបតីតេជោហ៊ុនសែនជាស្ថាបនិកនៃយោបាយ ឈ្នះ-ឈ្នះ និងជាបិតាសន្តិភាពរបស់កម្ពុជា ព្រមទាំងការដឹកនាំបន្តវេនយ៉ាងប៉ិនប្រសប់ ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាផងដែរ។

ឯកឧត្តម គួច ចំរើន បានបញ្ជាក់បន្ថែមថា សព្វថ្ងៃនេះព្រះរាជាណាចក្រកម្ពុជាយើង មានសុខសន្តិភាពពេញលេញ និងការអភិវឌ្ឍលើគ្រប់វិស័យទាំងផ្នែកពុទ្ធចក្រ និងអាណាចក្រ ប្រជាពលរដ្ឋ រស់នៅក្រោមដំបូលសុខសន្តិភាព។ ដូចនេះចូលបងប្អូនយើងត្រូវរួមគ្នារក្សាសុខសន្តិភាពនិងសមិទ្ធផលទាំងនេះឲ្យបានគង់វង្សស្ថិតស្ថេរ ដើម្បីទុកឲ្យកូនចៅជំនាន់ក្រោយរបស់យើងទទួលបានសមិទ្ធផល ដើម្បីជាប្រយោជន៍នៃការអភិវឌ្ឍប្រទេស និងសង្គមជាតិយើង។

នាឱកាសនោះដែរ ឯកឧត្តម អភិបាលខេត្តកណ្ដាល បានជំរុញដល់មន្ទីរអប់រំ យុវជន និងកីឡា ត្រូវខិតខំជំរុញការប្រលងប្រជែងអង្គភាពផ្តល់សេវាគំរូ ក្នុងការផ្តល់សេវាសាធារណៈក្នុងវិស័យអប់រំឲ្យបានកាន់តែល្អប្រសើរឡើងថែមទៀត។ ជាងនេះទៅទៀតនោះ មន្ទីរអប់រំខេត្ត សូមកុំមើលត្រឹមពានរង្វាន់ដែលនឹងទទួលបានក្នុងការប្រកួតប្រជែង តែត្រូវមើលលើសពីនេះ ពោលគឺអ្វីដែលនឹងទទួលបានពីការប្រឡងប្រជែងអង្គភាពផ្តល់សេវាសាធារណៈ ក្នុងវិស័យគំរូនេះ គឺជាការធ្វើឱ្យថ្នាក់ដឹកនាំ មន្ត្រីរបស់យើងទាំងអស់គ្នាបានយល់ដឹងបានកាន់តែច្បាស់នូវរាល់សូចនាករ ដើម្បីបំពេញចំណុចខ្វះខាតរបស់ខ្លួនឲ្យល្អគ្រប់សូចនាករដែលបានកំណត់ សំដៅយកមកបម្រើការងារជាក់ស្ដែងស្របតាមស្តង់ដារអប់រំជាតិ។ ជាងនេះទៅទៀតសូមអាជ្ញាធរ ក្រុង-ស្រុក ឃុំ-សង្កាត់ ត្រូវខិតខំលើកគម្រោង ដើម្បីស្នើសុំថវិកាដែលទទួលបានមកពីសួយសាររ៉ែ ដើម្បីយកមកអភិវឌ្ឃន៍ វិស័យអប់រំ វិស័យសុខាភិបាល និងអភិវឌ្ឍន៍មូលដ្ឋានខ្លួន។
ឯកឧត្តមអភិបាលខេត្ត ក៏បានក្រើនរំលឹកដល់ ប្រជាពលរដ្ឋ សិស្សានុសិស្សត្រូវបង្កើនការប្រុងប្រយ័ត្នខ្ពស់ចំពោះអគ្គីភ័យ ក្នុងរដូវក្ដៅនេះ ជាពិសេសត្រូវប្រយ័ត្ន ចំពោះខ្សែភ្លើងអគ្គិសនី ចៀសវាងបង្ករជាអគ្គីភ័យបណ្ដាលឲ្យបាត់បង់ទ្រព្យសម្បត្តិ និងអាយុជីវិត ត្រូវរួមគ្នាគោរពច្បាប់ចរាចរណ៍ទាំងអស់គ្នា និងសូមជៀសឲ្យឆ្ងាយពីគ្រឿងញៀន។ នាឱកាសនោះដែរ ឯកឧត្តមអភិបាលខេត្ត ព្រមទាំងអាជ្ញាធរមូលដ្ឋាន និងមន្ទីរអប់រំយុវជននិងកីឡាខេត្ត ក៏បានចុះទៅពិនិត្យស្ថានភាពសាលាបឋមសិក្សាត្រពាំងវែងផងដែរ។