ថ្នាក់ដឹកនាំខេត្ត អញ្ជើញជាអធិបតី ក្នុងពិធីលែងកូនត្រី ត្រីមេពូជ និងកូនបង្កង អបអរសាទរទិវាមច្ឆាជាតិ ១កក្កដា នៅទន្លេបាទី ស្រុកកណ្តាលស្ទឹង ខេត្តកណ្តាល
ថ្នាក់ដឹកនាំខេត្ត អញ្ជើញជាអធិបតី ក្នុងពិធីលែងកូនត្រី ត្រីមេពូជ និងកូនបង្កង
ខេត្តកណ្តាល៖ កូនត្រី២០ម៉ឺនក្បាល និងត្រីមេពូជចម្រុះ ចំនួន ៣០គីឡូក្រាម ព្រមទាំងកូនបង្កងចំនួន ៣ម៉ឺនក្បាល ត្រូវបានលែងចូលទៅក្នុងទន្លេបាទី ត្រង់ចំណុចវត្តកោះខ្នុរ ឃុំព្រែករកា ស្រុកកណ្តាលស្ទឹង ខេត្តកណ្តាល ដើម្បីអបអរសាទរ ទិវាមច្ឆាជាតិ ១កក្កដា ដែលពិធីនេះប្រព្រឹត្តទៅក្រោមអធិបតី ឯកឧត្តម ណៅ ធួក សមាជិកគណៈកម្មការទី៦ នៃរដ្ឋសភា និងជាតំណាងរាស្ត្រមណ្ឌលខេត្តកំពង់ចាម ឯកឧត្តម នូ សាខន ប្រធានក្រុមប្រឹក្សាខេត្ត ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល និងលោក Brune តំណាងក្រុមហ៊ុនទឹកបរិសុទ្ធ ហ្គេនស្បើក (Ganzberg) ព្រមទាំងមានការអញ្ជើញចូលរួមពីសំណាក់ ឯកឧត្តម-លោកជំទាវសមាជិកក្រុមប្រឹក្សាខេត្ត អភិបាលរងខេត្ត មន្ទីរ-អង្គភាពជុំវិញខេត្ត អភិបាលក្រុង-ស្រុកទាំង១៣ មន្ត្រីរាជការ ប្រជាពលរដ្ឋ និងសិស្សានុសិស្សជាច្រើនរូបទៀត។
ថ្លែងក្នុងពិធីនេះ ឯកឧត្តម គួច ចំរើន បានលើកឡើងថា ទិវាមច្ឆាជាតិ ១ កក្កដា ត្រូវបានបង្កើតឡើងក្រោមការផ្តួចផ្តើមដ៏ខ្ពង់ខ្ពស់របស់រាជរដ្ឋាភិបាលកម្ពុជា ក្នុងគោលបំណងបំផុសស្មារតីប្រជាពលរដ្ឋទូទាំងប្រទេស ឱ្យចូលរួមស្រឡាញ់ ថែរក្សា ការពារ និងអភិវឌ្ឍធនធានជលផល ប្រកបដោយចីរភាព និងនិរន្តរភាព។ ឯកឧត្តមអភិបាលខេត្តបានបញ្ជាក់ថា ធនធានជលផលមិនមែនគ្រាន់តែជាសម្បត្តិធម្មជាតិដ៏មានតម្លៃប៉ុណ្ណោះទេ ប៉ុន្តែជាមូលដ្ឋានសំខាន់នៃសន្តិសុខស្បៀងជាតិ ប្រភពប្រូតេអ៊ីនសម្រាប់សុខភាព និងជាប្រភពចំណូលដ៏សំខាន់សម្រាប់ប្រជាពលរដ្ឋនៅតាមមូលដ្ឋាន ដូច្នេះការលែងកូនត្រី ត្រីមេពូជ និងកូនបង្កងនាឱកាសនេះ គឺមិនមែនជាពិធីជានិមិត្តរូបតែប៉ុណ្ណោះទេ ប៉ុន្តែជាការចូលរួមជាក់ស្តែងក្នុងការបង្កើនបរិមាណផលស្តុកមច្ឆជាតិ និងស្តារប្រព័ន្ធជីវចម្រុះក្នុងទឹក។
ជាមួយគ្នានេះ ឯកឧត្តម គួច ចំរើន បានថ្លែងអំណរគុណ និងកោតសរសើរដល់ ក្រុមហ៊ុន ហ្គេនស្បើក (GANZBERG) ដែលបានចូលរួមឧបត្ថម្ភកូនត្រី និងកូនបង្កង សម្រាប់ពិធីដ៏មានសារៈសំខាន់នេះ ព្រមទាំងថ្លែងអំណរគុណដល់មន្ទីរកសិកម្ម រុក្ខាប្រមាញ់ និងនេសាទខេត្តកណ្តាល ខណ្ឌរដ្ឋបាលជលផលកណ្តាល រដ្ឋបាលស្រុកកណ្តាលស្ទឹង និងគ្រប់ភាគីពាក់ព័ន្ធ ដែលបានសហការរៀបចំពិធីនេះឱ្យប្រព្រឹត្តទៅដោយជោគជ័យ។
ឯកឧត្តមអភិបាលខេត្ត បានអំពាវនាវដល់ សិស្សានុសិស្ស ប្រជាពលរដ្ឋ និងគ្រប់ភាគីពាក់ព័ន្ធ សូមចូលរួមការពារធនធានមច្ឆជាតិ កុំឱ្យបាត់បង់ ឬផុតពូជ តាមរយៈការគោរពច្បាប់នេសាទ ជាពិសេសការគោរពរដូវបិទនេសាទ និងមិននេសាទក្នុងរដូវត្រីពងជាដាច់ខាត់ មួយវិញទៀត ប្រជាពលរដ្ឋត្រូវជៀសវាងការប្រើឧបករណ៍នេសាទខុសច្បាប់ ការឆក់ត្រី និងការប្រើសារធាតុពុលក្នុងការនេសាទ ដែលអាចបំផ្លាញទាំងមច្ឆជាតិ និងប្រព័ន្ធអេកូឡូស៊ីក្នុងទឹក។ ទន្ទឹមនឹងនេះ ឯកឧត្តម គួច ចំរើន បានលើកទឹកចិត្តដល់ប្រជាពលរដ្ឋឱ្យខិតខំ ចិញ្ចឹមត្រី និងបង្កើនការផលិតវារីវប្បកម្ម ដើម្បីចូលរួមផ្គត់ផ្គង់តម្រូវការត្រីក្នុងទីផ្សារ កាត់បន្ថយការពឹងផ្អែកលើការនេសាទធម្មជាតិ និងធានាឱ្យការប្រើប្រាស់ធនធានជលផលមានតុល្យភាព និងមានចីរភាព។
ក្រៅពីការអភិរក្សធនធានជលផល ឯកឧត្តមអភិបាលខេត្តក៏បានអំពាវនាវដល់ប្រជាពលរដ្ឋឱ្យបន្តចូលរួម ពង្រឹងគោលនយោបាយភូមិ-ឃុំមានសុវត្ថិភាព ប្រជាពលរដ្ឋទាំងអស់សូមចូលរួមសហការផ្តល់ព័ត៌មានជូនអាជ្ញាធរ និងសមត្ថកិច្ច ប្រសិនបើបានដឹងពីសកម្មភាពល្មើសច្បាប់ ឬជនដែលប្រព្រឹត្តបទល្មើស ជាពិសេសមាតាបិតា និងអាណាព្យាបាល ត្រូវយកចិត្តទុកដាក់អប់រំកូនចៅឱ្យជៀសវាងអំពើខុសច្បាប់ ចំពោះយុវជនត្រូវបន្តផ្សព្វផ្សាយការអប់រំណែនាំទៅកាន់មិត្តភក្កិទាំងដោយផ្ទាល់ និងតាមបណ្តាញសង្គម។
ក្នុងបរិបទរដូវភ្លៀង និងការកើនឡើងនៃប្រភពទឹក ឯកឧត្តមអភិបាលខេត្ត បានណែនាំឱ្យប្រជាពលរដ្ឋចូលរួមបង្ការជំងឺគ្រុនឈាម តាមរយៈការលុបបំបាត់ប្រភពទឹកដក់ ដែលជាជម្រកបង្កាត់ពូជមូសខ្លា បន្តដាក់ថ្នាំអាបែត និងអនុវត្តវិធានការបាញ់ថ្នាំកម្ចាត់មូសតាមការណែនាំរបស់មន្ត្រីជំនាញ ឯកឧត្តមអភិបាលថែមទាំងបានអំពាវនាវដល់មាតាបិតា និងប្រជាពលរដ្ឋ ត្រូវបង្កើនការប្រុងប្រយ័ត្នចំពោះគ្រោះថ្នាក់ដោយសារការលេងទឹករបស់កុមារ ក្នុងអំឡុងរដូវទឹកឡើង ដោយមិនត្រូវទុកកុមារឱ្យលេងទឹកតាមទីកន្លែងដែលមានហានិភ័យដោយគ្មានការឃ្លាំមើលពីមនុស្សធំ។
លោក ហេង សុភារិទ្ធិ នាយខណ្ឌរដ្ឋបាលជលផលកណ្តាល បានឱ្យដឹងថា ក្នុងពិធីអបអរសាទរទិវាមច្ឆាជាតិ ១កក្កដានាថ្ងៃនេះ មានការលែងកូនត្រី ២០ម៉ឺនក្បាល ត្រីគល់រាំង ២ក្បាល ត្រីរាជ ៣ក្បាល ត្រីមេពូជចម្រុះ ចំនួន ៣០គីឡូក្រាម និងកូនបង្កង ៣ម៉ឺនក្បាល ដើម្បីបង្កើនធនធានជលផលក្នុងធម្មជាតិឱ្យកាន់តែសម្បូរបែបថែមទៀត សម្រាប់ប្រយោជន៍សហគមន៍មូលដ្ឋាន។ ក្នុងរយៈពេល ៨ខែ ឆ្នាំ២០២៦ ខណ្ឌរដ្ឋបាលជលផលកណ្តាល បានសហការជាមួយកម្លាំងមានសមត្ថកិច្ចគ្រប់ថ្នាក់ ចុះស្រាវជ្រាវ និងបង្ក្រាបបទល្មើសនេសាទខុសច្បាប់ជលផល ចំនួន ១០៥លើក ដោយបានរុះរើ ដកហូតវត្ថុតាង រក្សាទុក និងបំផ្លាញចោល ចំនួន ៥៩ករណី និងបានចុះឃាត់ចាប់ និងអប់រំណែនាំ ចំពោះការនេសាទដោយប្រើឧបករណ៍ខ្នាតមធ្យម និងខ្នាតធំ ក្នុងរដូវបិទនេសាទផងដែរ។
