ឯកឧត្តម គួច ចំរើន ចុះពិនិត្យវឌ្ឍនភាពការសាងសង់អគារសិក្សា និងហេដ្ឋារចនាសម្ព័ន្ធ នៅសាលាបឋមសិក្សា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស
ខេត្តកណ្ដាល៖ ព្រឹកថ្ងៃទី២១ ខែសីហា ឆ្នាំ២០២៦ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានអញ្ជើញដឹកនាំមន្ទីរជំនាញពាក់ព័ន្ធ កងកម្លាំងមានសមត្ថកិច្ច និងអាជ្ញាធរស្រុកកណ្ដាលស្ទឹង ចុះពិនិត្យផ្ទាល់ពីវឌ្ឍនភាពនៃការសាងសង់អគារសិក្សា របង និងក្លោងទ្វារ នៅសាលាបឋមសិក្សា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស ដែលស្ថិតនៅក្នុងភូមិរលួស ឃុំដើមឫស ស្រុកកណ្តាលស្ទឹង ខេត្តកណ្តាល។
ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានឱ្យដឹងថា៖ ការចុះពិនិត្យ និងរៀបចំហេដ្ឋារចនាសម្ព័ន្ធសាលារៀននាពេលនេះ គឺដើម្បីធានា និងត្រៀមលក្ខណៈសម្បត្តិឱ្យបានរួចរាល់ក្នុងការទទួល សិស្សានុសិស្ស ឱ្យចូលសិក្សារៀនសូត្រក្នុងឆ្នាំសិក្សា២០២៦-២០២៧ ខាងមុខនេះ ប្រកបដោយបរិស្ថានល្អ ប្រសិទ្ធភាព និងសុវត្ថិភាពខ្ពស់។
គួរបញ្ចាក់ផងដែរថា សំណង់ដែលកំពុងដំណើរការសាងសង់ និងរៀបចំក្នុងសាលាបឋមសិក្សា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស រួមមាន៖
• អគារសិក្សា៖ សរុបចំនួន ៣ខ្នង (ស្មើនឹង ១៥បន្ទប់) ដោយក្នុងនោះ ២ខ្នង មានចំនួន ១០បន្ទប់ បានសាងសង់រួចរាល់ជាស្ថាពរ ហើយ ១ខ្នងទៀត មានចំនួន ៥បន្ទប់ កំពុងដំណើរការសាងសង់ ។
• ទីចាត់ការ៖ ចំនួន ២ខ្នង។
• បង្គន់អនាម័យ៖ ចំនួន ១២បន្ទប់។
• ការរៀបចំហេដ្ឋារចនាសម្ព័ន្ធបន្ថែម ការសាងសង់ក្លោងទ្វារ និងរបងព័ទ្ធជុំវិញបរិវេណសាលា។
