រដ្ឋបាលខេត្តកណ្ដាល រៀបចំពិធីសូត្រមន្តលើករាសីក្នុងឱកាសបុណ្យចូលឆ្នាំថ្មីប្រពៃណីជាតិ និងសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា និងមន្ត្រីចូលនិវត្តន៍ នាឱកាសបុណ្យចូលឆ្នាំថ្មី ប្រពៃណីយ៍ជាតិ

ខេត្តកណ្ដាល៖ ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានណែនាំដល់នាយករដ្ឋបាលខេត្ត នាយកទីចាត់ការចំណុះសាលាខេត្ត ត្រូវពិនិត្យឡើងវិញចំពោះ មន្ត្រីទាំងអស់ដែលនៅមានកំរិត ហើយកំរិតត្រឹមណា នឹងត្រូវមានវគ្គបណ្ដុះបណ្ដាលអោយចំគោលដៅ ដើម្បីសម្រេចកាត់បន្ថយមន្ត្រីដែលនៅមានកម្រិត និងឈានដល់ការលុបបំបាត់ចោលនូវពាក្យថាមន្ត្រីមានកម្រិតនៅក្នុងខេត្ត និងក្លាយជាមន្ត្រីដែលមានសក្ដានុពលឡើងវិញ។

ការណែនាំនេះធ្វើឡើងក្នុងពិធីសូត្រមន្តលើករាសីក្នុងឱកាសបុណ្យចូលឆ្នាំថ្មីប្រពៃណីយ៍ជាតិ និងសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា និងមន្ត្រីចូលនិវត្តន៍ នាឱកាសបុណ្យចូលឆ្នាំថ្មី ឆ្នាំម្សាញ់ សប្តស័ក ព.ស ២៥៦៩ គ.ស ២០២៥ ក្រោមអធិបតីភាពឯកឧត្ដម នូ សាខន ប្រធានក្រុមប្រឹក្សាខេត្តកណ្តាល និងឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល នារសៀលថ្ងៃទី០៧ ខែមេសា ឆ្នាំ២០២៥។

ឯកឧត្ដម អភិបាលខេត្ត បន្តថា៖ ការផ្ដល់សេវាសាធារណៈល្អ ប្រជាពលរដ្ឋស្រឡាញ់ ដូចនេះមន្ត្រីរបស់យើងត្រូវតែជាមន្ត្រីដែលមានសមត្ថភាព មានសក្ដានុពល ទើបធ្វើឱ្យយើងផ្ដល់សេវាសាធារណៈបានល្អជូនប្រជាពលរដ្ឋ។ ដូចនេះយើងទាំងអស់គ្នាជាថ្នាក់ដឹកនាំ ត្រូវរួមគ្នាក្នុងការកាត់បន្ថយពាក្យថាមន្ត្រីនៅមានកម្រិតនេះអោយក្លាយជាមន្ត្រីដែលមានសក្ដានុពលអោយកាន់តែច្រើនឡើង ដើម្បីរួមគ្នាក្នុងការបំពេញភារកិច្ចអោយកាន់តែប្រសើរឡើង។

ក្នុងឱកាសនោះដែរ ឯកឧត្តមអភិបាលខេត្ត បានពាំនាំមកនូវការផ្ដាំផ្ញើនូវការសាកសួរសុខទុក្ខពីណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានឧត្ដមក្រុមប្រឹក្សាព្រះមហាក្សត្រ និងសម្ដេចមហាបវរធិបតី ហ៊ុន ម៉ាណែត នាយកនៃព្ររាជាណាចក្រកម្ពុជា។

ឯកឧត្តមអភិបាលខេត្ត បានបញ្ជាក់ថា៖ ការសូត្រមន្តលើករាសីឆ្នាំថ្មី គឺជាទំនាមទំលាប់របស់ប្រជាពលរដ្ឋខ្មែរទូទាំងប្រទេស ក្នុងនោះរដ្ឋបាលខេត្តកណ្ដាល តែងតែរៀបចំពិធីសូត្រមន្តលើករាសីក្នុងឱកាសបុណ្យចូលឆ្នាំថ្មីប្រពៃណីយ៍ជាតិ និងសំណេះសំណាលជាមួយមន្ត្រីរាជការ ជារៀងរាល់ឆ្នាំ។

ក្នុងឱកាសនោះដែរ ឯកឧត្តមអភិបាលខេត្តកណ្ដាល បានណែនាំដល់រដ្ឋបាលក្រុង-ស្រុកទាំងអស់ ត្រូវរៀបចំព្រឹត្តិការណ៍កំសាន្តសប្បាយនៅតាមមូលដ្ឋានជូនប្រជាពលរដ្ឋ ពិសេសបំផុសចលនាបង្កើតនូវភាពសប្បាយរីករាយ តាមទីវត្តអារាមនានាផងដែរ។