ខេត្តកណ្តាល៖នាថ្ងៃទី០១ខែវិច្ឆិកាឆ្នាំ២០២៥ លោកស្រីដឹប អេងអភិបាលរងស្រុកកៀនស្វាយតំណាងលោកឡូវ សុខសានឮអភិបាលស្រុកបានអញ្ចើញជាអធិបតីភាពពិធីបើកបវេសនកាលឆ្នាំសិក្សា២០២៥-២០២៦នៅបរិវេណអនុវិទ្យាល័យគគីរ
ស្ថិតនៅភូមិគគីរក្នុងឃុំគគីរស្រុកកៀនស្វាយខេត្តកណ្តាល។
ដោយមានការចូលរួមពីលោកយឹម នីរ៉ានាយកអនុវិទ្យាល័យគគីរនិងលោកមុត សារិទ្ធមេឃុំគគីរនិងលោកគ្រូ.អ្នកគ្រូនិងក្មួយៗសិស្សានុសិស្ស យ៉ាងច្រើនកុះករ។
បន្ទាប់មកលោកស្រីដឹប អេងបានអានសារលិខិត របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសបើកបវេសនកាល ឆ្នាំសិក្សាថ្មី២០២៥-២០២៦ ត្រូវនឹងថ្ងៃទី០១ ខែវិច្ឆិកាឆ្នាំ២០២៥នេះដែលជាថ្ងៃបើកទំព័រថ្មីនៃការចាប់ផ្តើមជីវិតសិក្សាដំបូងគ្រប់កម្រិតរបស់ក្មួយៗ។
លោកស្រីដឹប អេងបានលើកឡើងថា៖ ក្នុងវិស័យអប់រំជាវិស័យអាទិភាពមួយ ដែលរាជរដ្ឋាភិបាល អាណត្តិទី៧បានយកចិត្តទុកដាក់ខ្ពស់ទាំងផ្នែកបរិមាណនិងគុណភាពដែលបានផ្តោតលើការពង្រឹងគុណភាពវិស័យអប់រំកីឡា វិទ្យាសាស្ត្រនិងបច្ចេកវិទ្យា។
លោកស្រីអភិបាល រងស្រុកបានលើកឡើងថា!ពិធីនេះប្រារព្ធឡើងក្នុងគោលបំណងប្រមែប្រមូលកុមារទាំងអស់ដែលគ្រប់អាយុចូលរៀននៅទូទាំងប្រទេសដើម្បីទទួលបាននូវការសិក្សានាដើមឆ្នាំសិក្សាថ្មីនិងដើម្បីជាការរំលឹកដល់ទិវាចំពោះគុណូបការៈរបស់លោកគ្រូ អ្នកគ្រូទាំងអស់ដែលបានបូជាកម្លាំងកាយចិត្តបង្ហាត់បង្រៀនដល់កុមារនិងយុវជនជំនាន់ក្រោយដែលជាទំពាំងស្នងឫស្សីក្នុងការអភិវឌ្ឍប្រទេសឱ្យរីកចម្រើនស្របតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល។
លោកស្រីបន្តថា៖ ក្រោមម្លប់នៃសុខសន្តិភាព របស់សម្តេចតេជោហ៊ុន សែននិងបន្តដឹកនាំដោយសម្តេចបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជាសម្តេចមានបំណងដើរឆ្ពោះទៅបង្កើតធនធានមនុស្ស ដើម្បីអភិវឌ្ឍន៍សង្គមនិងកំណើនសេដ្ឋកិច្ច។
លោកស្រីបានលើកទឹកចិត្តដល់ លោកគ្រូ អ្នកគ្រូ សូមយកចិត្តទុកដាក់ក្នុងការបំពេញការងារនឹងមានឆន្ទះមានសាមគ្គីភាពផ្ទៃក្នុងធ្វើយ៉ាងណាកុំឱ្យពុកម៉ែបងប្អូនប្រជាពលរដ្ឋនៅក្នុងមូលដ្ឋានមានការខកចិត្តមកលើយើង។
ជាមួយគ្នានោះដែរលោកមុតសារិទ្ធមេឃុំគគីរបានផ្តាំផ្ញើដល់ក្មួយៗសិស្សានុសិស្សទាំងអស់ធ្វើយ៉ាងណាត្រូវតែខិតខំរៀនសូត្រ ដើម្បីឱ្យក្លាយខ្លួនជាកូនល្អសិស្សល្អមិត្តល្អនិងពលរដ្ឋល្អ ជាពិសេសត្រូវឃ្លាតឆ្ងាយពីគ្រឿងញៀនដែលជាប្រភពនៃការបំផ្លាញអនាគតធ្វើឱ្យបាត់បង់ការសិក្សា ឃ្លាតឆ្ងាយពីគ្រួសារ និងសង្គមជាតិ។
ដោយៈប៉ក់ សារិទ្ធ
