វិទ្យាល័យជ័យវរ្ម័នទី៧បានប្រារព្វពិធីបើកបវេសនកាលជានិមិត្តរូប ថ្នាក់ស្រុក ឆ្នាំសិក្សា២០២៤-២០២៥

ស្រុកកៀនស្វាយ៖ នាព្រឹកថ្ងៃទី១ ខែវិច្ឆិកា ឆ្នាំ២០២៤ នៅវិទ្យាល័យជ័យវរ្ម័នទី៧ ក្នុងឃុំដីឥដ្ឋ លោក អ៊ូ ឈាង ប្រធានក្រុមប្រឹក្សាស្រុកកៀនស្វាយ រួមជាមួយលោក ឡូវ សុខសាន អភិបាល នៃគណៈអភិបាលស្រុកកៀនស្វាយ បានអញ្ជើញជាអធិបតីក្នុងពិធីបើកបវេសនកាលជានិមិត្តរូប ថ្នាក់ស្រុក ឆ្នាំសិក្សា២០២៤-២០២៥។

ក្នុងឱកាសនេះដែរ លោក ឡូវ សុខសាន អភិបាលស្រុក បានចូលរួមអបអរសាទរ ដល់សិស្សនៃវិទ្យាល័យជ័យវរ្ម័នទី៧ ចំនួន ៦រូប ដែលបានជាសិស្សឆ្នើមនិទ្ទេស A ការប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡង ៨ តុលា ២០២៤ នាពេលកន្លងទៅនេះ។

លោកអភិបាលស្រុក ក៏បានផ្ដាំផ្ញើរ និងរំលឹកដល់សិស្សានុ​សិស្ស​ទាំងអស់ត្រូវបន្តខិតខំប្រឹងប្រែងរៀនសូត្រ គោរពវិន័យ មានក្រមសីលធម៌ល្អ ថែរក្សាបរិស្ថានអនាម័យក្នុងសាលា ជុំវិញសាលា និងចូលរួមចំណែកនៅក្នុងការងារមនុស្សធម៌ និងការងារសង្គមផ្សេងៗឱ្យបានល្អប្រសើ។ ជាពិសេសប្អូនៗ ក៏ដូចជាក្មួយៗសិស្សានុសិស្សថ្នាក់ទី១២ឆ្នាំនេះ ដែលជាឆ្នាំត្រូវប្រឡងសញ្ញាបត្រមធ្យម​សិក្សាទុតិយភូមិ ត្រូវពង្រឹង និងបន្តសិក្សារៀនសូត្រដោយចិត្តទុកដាក់ បើមានកន្លែងណាមិនយល់ត្រូវសួរលោកគ្រូ អ្នកគ្រូ ពន្យល់ឱ្យបានច្បាស់លាស់ ដើម្បីឱ្យការប្រឡងទទួលបាននិទ្ទេសល្អគ្រប់ៗគ្នា។

ឆ្លៀតក្នុងឱកាសនេះ លោក ឡូវ សុខសាន អភិបាលនៃគណៈអភិបាលស្រុកកៀនស្វាយ បានថ្លែងអំណរគុណ និងដឹងគុណបំផុតចំពោះ សម្តេច មហាបវធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែល សម្តេច តែងតែយកចិត្តទុកដាក់ពីសុខទុក្ខបងប្អូនប្រជាពលរដ្ឋគ្រប់ពេលវេលា និងគ្រប់កាលៈទេសៈ ដោយមិនទុកឱ្យ​ប្រជាពលរដ្ឋណាម្នាក់រងនូវការលំបាកឡើយ ពិសេស សម្តេច លើកតម្កើងវិស័យអប់រំ យុវជន និងកីឡា ជាវិស័យស្នូរ ក្នុងចំណោមវិស័យសំខាន់ៗជាច្រើនទៀត។

ពិធីនេះមានការអញ្ជើញចូលរួមលោក លោកស្រី សមាជិកក្រុមប្រឹក្សាស្រុក នាយក នាយករងរដ្ឋបាលស្រុក តំណាងមន្ទីរអប់រំ រយុវជន និងកីឡា ប្រធាន អនុប្រធានការិយាល័យចំណុះរដ្ឋបាលស្រុក ក្រុមប្រឹក្សាឃុំដីឥដ្ឋ លោកគ្រូ អ្នកគ្រូ និងសិស្សានុសិស្សនៅវិទ្យាល័យជ័យវរ្ម័នទី៧។